ქუთაისის “ტორპედო” “ვიკინგურს” უმასპინძლებს
ქუთაისის “ტორპედო” ევროპა ლიგის მეორე საკვალიფიკაციო ეტაპის პირველ მატჩს ხვალ “ვიკინგურის წინააღმდეგ ჩაატარებს.
ჟურნალისტებთან ისაუბრა ქუთასელთა მთავარმა მწვრთნელმა კახა ჩხეტიანმა.
“როგორც ყველა მატჩს, ამასაც სრული სერიოზულობით ვეკიდებით. გუნდი ხვალინდელ შეხვედრას სრულ მზადყოფნაში ხვდება. ტრავმა მოიშუშა გრიგოლ დოლიძემ, რომელიც გუნდთან ერთად ვარჯიშობს და ხვალ 18-კაციან განაცხადშიც იქნება. ხვალ მოედანზე გასული “ტორპედო” მხოლოდ გამარჯვებისთვის ითამაშებს!”
მეტოქეზე: “ყველა მეტოქე დაფასებას იმსახურებს. ექსპერიმენტების დრო არ გვაქვს. ევროპალიგაა, ქვეყნის სახე ვართ და ჩვენი მხრიდან არასერიოზული იქნება, თუ ამ მატჩს ექსპერიმენტებისთვის გამოვიყენებთ. არაერთი მაგალითი გვაქვს იმისა, თუ რა მოაქვს არასერიოზულ დამოკიდებულას!”
თორნიკე კაპანაძეზე: “რაც სეზონი დაიწყო, სამწუხაროდ ტრავმების გამო მან თავისი შესაძლებლობები ვერ გამოავლინა ისე, როგორც სურს და როგორც შეუძლია. წინა შეხვედრაში ის ცვლილებაზე შემოვიდა და მზადაა ხვალინდელი მატჩისთვისაც. თორნიკე კაპანაძე ის ფეხბურთელია, რომელიც ნებისმიერ წუთს მზადაა გუნდის წარმატებაში თავისი წვლილი შეიტანოს და მოედანზე ბოლომდე დაიხარჯოს.”
ლეგიონერებზე: “ის, რომ გუნდში ამდენი ტრანსფერი განხორციელდა, გამომდინარეობს იმ შედეგიდან, რომლის მიღწევაც გვსურს. ამ ფეხბურთელებმა “ტორპედოს” წარმატებაში თავისი წვლილი უნდა შეიტანონ. გარდა ამისა, მათი აქ ყოფნა ჩვენი ფეხბურთელებისთვის დამატებითი მოტივაციაა. გვინდოდა, კონკურენტუნარიანი გუნდი გვყოლოდა, რადგან წარმატება ყოველთვის იქაა, სადაც კონკურენციაა. დღეს ასეთი გუნდი გვყავს და კარგი ლეგიონერით ადგილობრივი გულშემატკივარიც არ იქნება უკმაყოფილო.”-განაცხადა კახა ჩხეტიანმა.
წინასამატჩო პრესკონფერენციაზე “ტორპედოელთა” ლიდერმა გიორგი ქიმაძემაც ისაუბრა.
“პირველ რიგში, ვიტყვი იმას, რომ მატჩისწინ გუნდში მშვენიერი განწყობაა. ვფიქრობ, ამ მნიშვნელოვანი მატჩისთვის სათანადოდ მოვემზადეთ და ხვალ ყველაფერს გავაკეთებთ, რომ გავიმარჯვოთ და ფარერებში სასურველი ანგარიშით ჩავიდეთ.
წარმატებისთვის მნიშვნელოვანი იქნება გულშემატკივრის როლიც და მოვუწოდებ, მოვიდნენ სტადიონზე, გვერდში დაგვიდგნენ. ჩვენის მხრივ, ვპირდებით, რომ სასურველი ანგარიშის მისღწევად თავს არ დავზოგავთ!”
ქუთაისელები “ვიკინგურს” 26 ივლისს, რამაზ შენგელიას სახელობის სტადიონზე უმასპინძლებენ. მატჩი კი 20 საათზე დაიწყება.