შერმადინის ტენერიფემ ანდრონიკაშვილის ანდორას სტუმრად მოუგო

ესპანეთის საკალათბურთო ჩემპიონატის (ლიგა ენდესა) მე-8 ტურში საინტერესო და პრინციპული ქართული დაპირისპირება გაიმართა. რატი ანდრონიკაშვილის „მორაბანკ ანდორამ“ საკუთარ კედლებში გიორგი შერმადინის „ლაგუნა ტენერიფეს“ უმასპინძლა. დაძაბულ ბრძოლაში სტუმრებმა კლასი დაამოწმეს და გამარჯვება 6-ქულიანი სხვაობით, 90:84 მოიპოვეს.

ორივე ქართველმა კალათბურთელმა მატჩი სათადარიგო სკამიდან დაიწყო. „ტენერიფეს“ 37 წლის გამოცდილმა ცენტრმა, გიორგი შერმადინმა პარკეტზე 23 წუთი და 43 წამი გაატარა და თავის გუნდს 8 ქულა, 7 მოხსნა და 1 შედეგიანი გადაცემა შესძინა. გიორგიმ ორქულიანებში კარგი სიზუსტე აჩვენა (5-დან 3 ზუსტი სროლა), ხოლო საჯარიმო ხაზიდან ორივე მცდელობა (2/2) გამოიყენა. მის აქტივში თითო პერსონალური ფოლი და დაკარგვა იყო, ხოლო „პლუს-მინუს“ კოეფიციენტი +6 გახლდათ.

რაც შეეხება „ანდორას“ 25 წლის მცველს, რატი ანდრონიკაშვილმა მოედანზე 8 წუთი და 26 წამი დაყო. რატიმ მეტოქის ფარს ერთადერთხელ შეუტია და პერიმეტრიდან აბსოლუტურად ზუსტი იყო (1/1 სამქულიანი), რითაც გუნდს 3 ქულა, 1 მოხსნა და 2 შედეგიანი გადაცემა მოუტანა. მის პასივში 2 ფოლი და +3 „პლუს-მინუს“ მაჩვენებელი დაფიქსირდა.

შეხვედრის მთავარი მეგზური და ყველაზე შედეგიანი მოთამაშე სტუმართა ურყევი ვეტერანი, ბრაზილიელი მარსელო უერტასი გახდა, რომლის ანგარიშზეც 21 ქულა დაგროვდა.

ამ გამარჯვებით „ტენერიფემ“ სატურნირო ცხრილში პოზიციები გაიმყარა — კანარის კუნძულელებს 6 მოგება და 2 მარცხი აქვთ და ცხრილში მხოლოდ მადრიდის „რეალს“ (7-0) ჩამორჩებიან. შერმადინის გუნდი მომდევნო ტურში, 22 ნოემბერს, საკუთარ არენაზე „ბარსელონას“ დაუპირისპირდება. რაც შეეხება ანდრონიკაშვილის „ანდორას“, 1 მოგებითა და 7 მარცხით გუნდი მე-16 ადგილს იკავებს და მომდევნო შეხვედრას 21 ნოემბერს, სტუმრად „მანრესასთან“ გამართავს.

წყარო: gbf.ge