“ტორპედომ” “ვიკინგური” იოლად დაამარცხა

ევროპალიგის მეორე საკვალიფიკაციო ეტაპის პირველი მატჩი გაიმართა ქუთაისში, რამაზ შენგელიას სახელობის სტადიონზე. ადგილობრივმა ქუთაისის “ტორპედომ” ” გოტას “ვიკინგურს” უმასპინძლა და 3-0 დაამარცხა. მატჩის ფავორიტად იმერული კლუბი იყო მიჩნეული და ქუთაისელებმაც მოლოდინი გაამართლეს.

“ტორპედოელებმა” თამაში აქტიურად დაიწყეს და პირველივე წუთებიდან მწვავედ შეუტიეს მეტოქეს. თუმცა “ვიკინგური” მთელი გუნდით თავს იცავდა და მასპინძლები გოლის გატანს ვერ ახერხებდნენ.  ქუთაისელებმა შეხვედრის 27-ე წუთზე მაინც შეძლეს ანგარიშის გახსნა, მათე ცინცაძემ ბურთი კუთხურიდან ჩამოაწოდა და თორნიკე კაპანაძემ კარების მიმართულებით ბურთი ზუსტად გადაგზავნა.

მატჩის მე-40 წუთზე “ტორპედოელთა” ახალწვეულს , დაფეს სხვაობის გაზრდა ორამდე შეეძლო, მის მიერ წამოწყებული სწრაფი კონტრშეტევა საბოლოოდ უშედეგოდ დასრულდა. მეორე ტაიმში “ტორპედოელთა” მთავარმა მწვრთნელმა კახა ჩხეტიანმა მოედანზე ლაზარ მარინის ნაცვლად მილოს ლაჩნი შემოიყვანა. ქუთაისელები მეტოქის კართან სახიფათო მომენტებს ქმნიდნენ, მაგრამ მეორე გოლის გატანას მაინც ვერ ახერხებდნენ. თუმცა შეხვედრის 73-ე წუთზე გიორგი ქიმაძემ თორნიკე კაპანაძის პასი გამოიყენა და “ტორპედოელები” ორი ბურთით დააწინაურა.

“ტორპედო” ანგარიშის მიუხედავად შეტევებს აგრძელებდა და 85-ე წუთზე, ლევან კუტალიამ თავური დარტყმით ქუთაისელები 3-0 დააწინაურა და შეხვედრის საბოლოო ანგარიშიც დააფიქსირა.

მატჩის შემდეგ ჟურნალისტებთან ისაუბრა “ტორპედოელთა” მთავარმა მწვრთნელმა კახა ჩხეტიანმა.

“გამარჯვება ყოველთვის სასიამოვნოა, 3:0 მითუმეტეს. ჩვენ გვქონდა ბევრი მომენტები, მათაც მივეცით შანსი კონტრშეტევების და რამდენჯერმე ჰქონდათ გოლის გატანის შესაძლებლობა, გოლი რომ გასულიყო, არ ვიცით როგორ დასრულდებოდა თამაში.

მთლიანობაში შეხვედრა კარგი გამოვიდა, შეთამაშების მომენტიც იგრძნობა და მინდა მადლობა გადავუხადო ჩვენს ბიჭებს, რომ ბოლომდე იბრძოლეს. ანგარიში არ არის ისეთი, რომ წყნარად ყოფნის უფლება გვქონდეს, შევეცდებით მეორე შეხვედრაშიც გავიმარჯვოთ.

ლეგიონერები სასურველი ფორმიდან ჯერ შორს არიან, მათი ჩემპიონატები მაისის ბოლოს დამთავრდა და
ფიზიკური მომზადება აკლიათ. ისინი გუნდთან ერთად მაქსიმალურად ემზადებიან და ვიმედოვნებ, რომ თამაშიდან თამაშამდე მოუმატებენ.

ყველა ფეხბურთელი საკმაოდ მოტივირებულია და გუნდში ჯანსაღი კონკურენციაა. ვფიქრობ, როცა გუნდი შეთამაშდება, მოუმატებს და უკეთესს შედეგს დავდებთ.

მეორე ტაიმში ცვლილებები შეტევის გასაძლიერებლად გაკეთდა, ამან გამოიწვია შეხვედრიდან ლაზარ მარინის მოხსნა და თავდამსხმელის შემოყვანა, რამაც საბოლოოდ გაამართლა.

ამ ეტაპისთვის ტრანსფერები დასრულდა, დამატებით ვეღარავის დავიმატებთ. რაც შეეხება ახალწვეულ ლაცნის, შეხვედრაში კარგად ჩაერთო და ჰქონდა რამდენიმე მომენტი.

ჩვენ 30 რიცხვში გავემგზავრებით ფარერების კუნძულებზე და პირველ აგვისტოს ვიქნებით ადგილზე. იქ ანგარიშის შენარჩუნებისთვის არ ვითამაშებთ, ვერ ვიტყვი, რომ იოლი მატჩი იქნება, თუმცა ჩვენ ვეცდებით სასურველი შედეგით დასრულებას.”- განაცხადა კახა ჩხეტიანმა

შემადგენლობები:

ქუთაისის “ტორპედო”: კვასხვაძე, გეგეჭკორი, კობახიძე, აზაცკი, მარინი (ლაცნი 45′), გლინკა (კუხიანიძე 70′), ცინცაძე, დაფე (დოლიძე 59′), კუტალია, ქიმაძე, კაპანაძე.

“ვიკინგური”: რასმუსენი, იაკობსენი, გრეგსენი, ლერვიგი, ნიბლასი, ლოკინი, იანსენი (ლერვიგი 59′), ჯორჯევიჩი, ს.ვატნჰამარი, გ.ვატნჰამარი, ლავალი.

საპასუხო შეხვედრას ქუთაისის “ტორპედო” 2 აგვისტოს გამართავს.