“ტორპედოს” მომავალი მეტოქის ვინაობა ცნობილია

ქუთაისის “ტორპედომ” ევროპალიგის მეორე საკვალიფიკაციო ეტაპის განმეორებით მატჩში ფარერების ჩემპიონი,  “ვიკინგური” 4-0 დაამარცხა და შემდეგ ეტაპზე გავიდა.

თამაში ქუთაისელებმა აქტიურად დაიწყეს  და მეტოქეს პირველივე წუთებიდან შეუტიეს. მე-11 წუთზე კი ანგარიშიც გახსნეს. გოლი “ტორპედოელთა” ახალწვეულმა მილოშ ლანჩიმ გაიტანა.

24-ე წუთზე მათე ცინცაძემ კუთხურიდან მოწოდებულ ბურთს “ტორპედოელთა” ცენტრალურმა მცველმა, მამუკა კობახიძემ კარგად დაუხვედრა თავი და იმერული გუნდი ორი ბურთით დააწინაურა.

პირველის მსგავსად, მეორე ტაიმშიც ქუთაისელები ისევ აგრძელებდნენ შეტევებს და  59-ე წუთზე “ტორპედოელთა” კიდევ ერთმა ლეგიონერმა ალექსანდრე აზაცკიმ გამოიჩინა თავი და მეტოქეს მესამე ბურთი გაუტანა.

თამაშის 81-ე წუთზე “ტორპედოელებმა” სწრაფი კონტრიერიში წამოიწყეს. საკუთარი ნახევრიდან ბურთი გიორგი ქიმაძემ წამოიღო, შემდეგ მათე ცინცაძე ჩართო შეტევაში, მათემაც ფნალგიდან საჯარიმოში კარგად ჩააწოდა  და ბურთი თორნიკე კაპანაძეს მიუვიდა, “ტორპედოელთა” 9 ნომერს კი არ გასჭირვებია გოლის გატანა.

ქუთაისელების აქტიური შეტევების მიუხედავად თამაშში მეტი გოლი აღარ გასულა. ამრიგად “ტორპედოელებმა” მეტოქე 4-0 გაანადგურეს.

9 აგვისტოს თბილისში, მიხეილ მესხის სახელობის სტადიონზე  ქუთაისის “ტორპედო” ევროპალიგის მესამე საკვალიფიკაციო ეტაპის პირველ მატჩს გამართავს. ქუთაისელთა მეტოქე კი ალბანეთის მოქმედი ჩემპიონი “კუკესი”იქნება.

ალბანელები “ტორპედოელების” მსგავსად ჩემპიონთა ლიგის საკვალიფიკაციო ეტაპებზე გამოდიოდნენ. “კუკესმა” მალტის ჩემპიონი, “ვალეტა” სტუმრად გატანილი ბურთის წყალობით გამოთიშეს გათამაშებას. მეორე ეტაპზე კი აზერბაიჯანის ჩემპიონ “ყარაბაღს” დაუპირისპირდნენ და ორი მატჩის ჯამში 3-0 დამარცხდნენ.