“ტორპედო” “ლუდოგორეცთან” საბრძოლველად მზადაა

23 აგვისტოს ქუთაისის “ტორპედო” ევროპალიგის პლეი-ოფის პირველ შეხვედრას გამართავს და რაზგრადის “ლუდოგორეცს” დაუპირისპირდება. მატჩი თბილისში, “მიხეილ მესხის” სახელობის სტადიონზე გაიმართება და 20 საათძე დაიწყება.

წინასამატჩო პრესკონფერენციაზე ისაუბრა “ტორპედოელთა” მთავარმა მწვრთნელმა კახა ჩხეტიანმა.

“ეს შეხვედრა განსხვავდება სხვა მატჩებისგან თავისი მნიშვნელობით. როგორც ჩვენი გუნდისთვის, ისე მთლიანად საქართველოსთვის. განსაკუთრებულად ვემზადებით და ყველა ფეხბურთელი მზადყოფნაშია, რომ სიხარული მოვუტანოთ საქართველოს.

დაცვიდან თამაშს არასდროს არ ვცდილობთ. უბრალოდ, ის არის, რომ ახალი შეკრებილები ვიყავით და პირდაპირ თამაშები დავიწყეთ. დრო არ გვქონდა და პრაქტიკულად ოფიციალურ მატჩებში უწევს გუნდს შეთამაშება. ამას ემატება მგზავრობა და ესეც მოქმედებს. მადლობა ღმერთს მომდევნო ეტაპზე ჩვენ გავედით. ძალიან მინდა, რომ მიზანს, რომელიც დასახული გვაქვს, მივაღწიოთ. ორი თამაში დარჩა და უკვე ჯგუფში ვხვდებით. რა თქმა უნდა, შეტევაშიც აქტიურები უნდა ვიყოთ და თავიც დავიცვათ კარგად. რაც მთავარია, ეს უნდა მოხდეს სწრაფად და ორგანიზებულად.

“კუკეშთან” მატჩის ხარისხით კმაყოფილები რა თქმა უნდა, არ ვართ, მაგრამ წეღანაც ვახსენე, რომ გუნდი შეუთამაშებელი იყო და პირდაპირ თამაშებიდან მოგვიწია ფორმაში შესვლა. რაც არ მოხერხდა ამ თამაშამდე, ვეცდებით, ხვალინდელ შეხვედრაში ვაჩვენოთ.

ეროვნული ლიგის გადადებულ მატჩებს რაც შეეხება, ვერ მოვახერხებდით აღდგენას და გაცილებით უარესი იქნებოდა. მინდა, ფეხბურთის ფედერაციას და კლუბებს მადლობა გადავუხადო, რომ ეს ყველაფერი გაიგეს.

რა თქმა უნდა, “ლუდოგორეცის” ფინანსური კუთხით ვერ გავეჯიბრებით. ვიტყვი, რომ კომბინაციურ ფეხბურთს თამაშობენ, თუმცა, ბოლო მატჩები ვნახე და დამაგვირგვინებელ ფაზაში მთლად კარგად ვერ მოქმედებენ. რას დავუპირისპირებთ? – ამას ხვალინდელი თამაში გვიჩვენებს.

ქუთაისში თამაში ჩვენთვის ნიშნავს ყველაფერს, რადგან ყველამ ვიცით იქაური გულშემატკივრის ამბავი. დარწმუნებული ვარ, რომ იქ სტადიონი ბოლომდე გაივსებოდა. ძალიან უყვართ ჩვენს ქალაქში ფეხბურთი. რომ იტყვიან, ფეხბურთის გიჟები არიან და მართლა გულით უდგანან გუნდს გვერდში. ზუსტად ვიცი, მათთვის რას ნიშნავს ქუთაისის “ტორპედო” და რამხელა სიხარული მოჰყვებოდა იქ რომ გვეთამაშა.

იმედი მაქვს, რომ სამომავლოდ გამოსწორდება სიტუაცია, ალბათ, ჩვენს მერიასაც გული შესტკივა ამ ყველაფერზე და სტადიონი გაკეთდება. დარწმუნებული ვარ, ყველა ქუთაისელი, რომელსაც გუნდი უყვარს, ხვალ თბილისში იქნება. ჩვენთვის ძალიან მნიშვნელოვანია გულშემატკივარი, რადგან მაყურებლის გარეშე ფეხბურთის თამაშს აზრი არ აქვს. იმედია, ხვალ სტადიონზე ბევრი გულშემატკივარი მოვა.”- განაცხადა კახა ჩხეტიანმა.

“ლუდოგორეცის” მთავარი მწვრთენლი იმედიანადაა განწყობილი. “ყველა გუნდი მოსაგებად თამაშობს, ასევე ვითამაშებთ საქართველოშიც. პატივს ვცემთ “ტორპედოს” და ხვალინდელ შეხვედრაში ყველაფერს გავაკეთებთ წარმატებული შედეგისთვის. ჩვენი გუნდი “ტორპედოს” წინააღმდეგ მზადაა ფიზიკურად და მენტალურად. რა თქმა უნდა, ჩვენ ვუყურეთ “ტორპედოს” უკანასკნელ შეხვედრებს. “ლუდოგორეცი” უნდა მიჰყვეს იმ გეგმას, რომელსაც დავუსახავ ბიჭებს. მატჩი ორდუელიანია და ყველაფერი ამის შემდეგ გადაწყდება”.

ფოტო: fctorpedo.ge