უკრაინა 1:0 საქართველო
საქართველოს ეროვნულმა ნაკრებმა უეფას ერთა ლიგის ჯგუფური ეტაპის დასკვნითი შეხვედრა უკრაინასთან გამართა. სლოვაკეთის ქალაქ კოშიცეში ჩატარებული მატჩი ნომინალური მასპინძლების გამარჯვებით, 1:0 დასრულდა.
უკრაინასთან შეხვედრაში საქართველოს ნაკრების შემადგენლობაში გიორგი მოისწრაფიშვილის, გიორგი მაისურაძის და გიორგი გაგუას დებიუტი შედგა.
საქართველოს ნაკრებმა ჯგუფში მეოთხე ადგილი დაიკავა და B ლიგაში ადგილის შესანარჩუნებლად პლეი-ოფში მოუწევს თამაში. ჯგუფის მეორე მატჩი, ჩრდილოეთ ირლანდიის და უნგრეთის ნაკრებებს შორის ფრედ, 1:1 დასრულდა. ერთა ლიგის B2 ჯგუფის გამარჯვებული ჩრდილოეთ ირლანდია გახდა, უნგრეთი კი A ლიგაში გადასასვლელ პლეი-ოფში ითამაშებს.
ერთა ლიგის პლეი-ოფში საქართველოს ნაკრების სავარაუდო მეტოქეები ბელარუსის, კვიპროსის, ფარერის კუნძულებისა და ესტონეთის ნაკრებები არიან. წილისყრა 20 ნოემბერს გაიმართება, პლეი-ოფის შეხვედრები კი 2027 წლის მარტში ჩატარდება.
რამაზ სვანაძე (ეროვნული ნაკრების მთავარი მწვრთნელი): “ვცდილობდით, ყველა მატჩში პირველ ნომრად გვეთამაშა, თუმცა დამაგვირგვინებელ ფაზაში პრობლემები გვქონდა და ეს ფაქტია. გასათვალისწინებელია ისიც, რომ როდესაც გუნდის შენება იწყება, ყველაფერი ბურთის ფლობიდან მოდის, საგოლე მომენტები კი ნელ-ნელა უნდა დაიხვეწოს. ამასთან, დაგვიბრუნდებიან ის ფეხბურთელები, რომლებიც შეგვმატებენ იმ ხარისხს, რაც განსაკუთრებით შეტევის დასკვნით ფაზაში გვჭირდება.
კრიტიკა იყო და ახლა კიდევ უფრო მეტი იქნება, რაც აუცილებლად უნდა მივიღოთ. როდესაც საქართველოს ნაკრებს ასეთი წარუმატებელი სერია აქვს, კონკრეტულად ერთ თამაშზე საუბარი ნაკლებად მიზანშეწონილია. ვთვლი, რომ დასრულდა ერთი დიდი ციკლი და მარტიდან სულ სხვა გუნდი უნდა ვიყოთ: განსხვავებული შემადგენლობით, შემართებითა და მენტალობით. წარსულის მიღწევებისთვის ყველას მადლობას ვუხდი, ეს ძალიან კარგი იყო, თუმცა დღევანდელი დღე და მომავალია ყველაზე მთავარი.
დავდექით იმ რეალობის წინაშე, რომ ყველაფერი თავიდან გვაქვს დასაწყები. ერთი რამ შემიძლია გითხრათ: ეს პროცესი უკვე დაწყებულია და ისე გაგრძელდება, რომ გულშემატკივარი და მთელი ქვეყანა კვლავ იხილავს ისეთ ეროვნულ ნაკრებს, როგორიც ევროპის ჩემპიონატის დღეებში იყო, როცა მთელი საქართველო ერთიანი გახლდათ. ახლა ჩვენ ძალიან გვჭირდება ერთიანობა და გვერდში დგომა. შეცდომები ჩვენს პროფესიაში ჩვეულებრივი მომენტია და ეს ეხება ყველას — როგორც ფეხბურთელებს, ისე მწვრთნელებს. არ ცდება მხოლოდ ის, ვინც არაფერს აკეთებს. თუმცა, ამ კონკრეტულ სიტუაციაში ყველაფერი მეორეხარისხოვანია; მთავარია, თავიდან დავიწყოთ იმ გუნდის შენება, რომლის კონტურებიც უკვე არსებობს და რომლითაც ყველა იამაყებს.
აუცილებლად უნდა ვთქვა ერთი რამ: ბოლო დღეებში ბევრგან შემხვდა მოსაზრება, თითქოს ისევ ჭაობში დავეშვით. გარწმუნებთ, საქართველოს ეროვნული ნაკრები ჭაობში არ დაეშვება. მარტში გველის პლეი-ოფი, რომელსაც ნაკრები აუცილებლად დაძლევს, რადგან ამისთვის აქამდეც ყველაფერი კეთდებოდა და მომავალში კიდევ უფრო მეტი გაკეთდება. ჩვენ ვთამაშობთ B დივიზიონში. ფაქტია, რომ ამ ეტაპზე A დივიზიონისთვის მზად არ ვიყავით, თუმცა შეგვწევს იმის ძალა და პოტენციალი, რომ შევინარჩუნოთ ადგილი B დივიზიონში და ეტაპობრივად გავზარდოთ სათამაშო ხარისხი.
გარდა ამისა, ნაკრებთან ერთად უკვე მერვე წელია მოვდივარ და კარგად ვიცოდი, სად მოვდიოდი. ამ რვა წლის განმავლობაში ერთად ვიყავით იმ უდიდესი წარმატებების მონაწილენი, რაც ქართულ ფეხბურთს ჰქონია. ახლა კი პირველად გვიწევს, ერთად ვიყოთ ამ კრიზისის მონაწილენიც. პირდაპირ შემიძლია გითხრათ, რომ ყველაფერს გავაკეთებ ამ მდგომარეობის მალე დასაძლევად. ჩვენ კრიზისების გადალახვის გამოცდილება გვაქვს. ეს ტვირთი რეალურად ჩემზე მოდის და მე უნდა ვზიდო, თუმცა კარგად ვიცი, რა შეგვიძლია. ყველა დასახული გეგმა აუცილებლად შესრულდება, ამიტომ გარწმუნებთ, მარტიდან თქვენ იხილავთ აბსოლუტურად განსხვავებულ საქართველოს ეროვნულ ნაკრებს — ისეთს, როგორიც ყველას გვსურს“.
წყარო: nakrebi.ge