ქუთაისის “ტორპედო” დღეს ტირასპოლის “შერიფს” დაუპირისპირდება

ქუთაისის “ტორპედო” ჩემპიონთა ლიგის პირველი საკვალიფიკაციო ეტაპის განმეორებით მატჩში ტირასპოლის “შერიფს” დაუპირისპირდება. შეგახსენებთ, რომ საქართველოს მოქმედმა ჩემპიონმა პირველი შეხვედრა, ქუთაისში,  2-1 მოიგო.

მასპინძლები თავიდანვე წყვილის ფავორიტად მიიჩნეოდნენ, თუმცა პირველმა შეხვედრამ აჩვენა, რომ ქუთაისელებს მინიმუმ ტოლსწორად თამაში შეუძლიათ  და შემდეგ ეტაპზე გასასვლელად საკმარისი რესურსიც გააჩნიათ.

ქუთაისის “ტორპედოს” კაპიტანმა , როინ კვასხვაძემ, ჟურნალისტებთან მოახლოვებულ მატჩზე კომენტარი გააკეთა.

“3 დღეა ტირასპოლში ვართ და ვემზადებით ამ უმნიშვნელოვანესი შეხვედრისთვის. 2:1 არ არის ის ანგარიში, რომელიც წყნარად ყოფნის საშუალებას მოგვცემს, ამიტომ ხვალინდელ მატჩს სრული სერიოზულობით ვეკიდებით. “შერიფი” ძალიან კარგი გუნდია და ვიცით, რომ იოლი შეხვედრა არ გველის, თუმცა ყველაფრისთვის მოვემზადეთ. გუნდში საბრძოლო განწყობაა და დიდი იმედი მაქვს, რომ ჩემპიონთა ლიგის მეორე საკვალიფიკაციო ეტაპზე ჩვენ გავალთ. საამისოდ, ფეხბურთელები ყველაფერს ვიზამთ,” – განაცხადა კვასხვაძემ.

ჟურნალისტებთან ისაუბრა მასპინძელთა მთავარმა მწვრთნელმა, გორან საბლიჩმა.

“მოგება გვჭირდება, რათა შემდეგ ეტაპზე გავიდეთ. რთული თამაში იქნება, თუმცა მზად ვართ. თავდასხმასა და დაცვაში ბალანსი უნდა დავიჭიროთ და იმაზე უკეთ ვიმოქმედოთ, ვიდრე პირველ შეხვედრაში. ჩვენი გუნდის განაცხადში მყოფი ყველა მოთამაშე ჯანმრთელია და ეს თამაში ყველასთვის პრესტიჟულია. ამიტომაც, მჯერა, თავდადება უმაღლეს დონეზე იქნება.

უპირველესად, უნდა ვირწმუნოთ, რომ მომდევნო ეტაპზე თამაში შეგვიძლია. ამიტომ, საჭიროა არა 3–4, არამედ, მთელი გუნდით შეტევა.

“ტორპედო” სერიოზული გუნდია, რომელიც ბურთს შესანიშნავად აკონტროლებს. ამიტომ, უბურთოდ ბევრი უნდა ვიმუშავოთ. მჯერა, ჩემი გუნდი საუკეთესო თამაშს აჩვენებს,” – განაცხადა საბმიჩმა.

ქუთაისის “ტორპედო” მოლდოვური ბარიერის დაძლევის შემთხვევაში, მაკედონიის ჩემპიონს, “შკენდიას”,  დაუპირისპირდება.

ფოტო: fctorpedo.ge