გოგა ბითაძემ ევროლიგაში მორიგი შედეგიანი შეხვედრა ჩაატარა

გოგა ბითაძემ ევროლიგაში მორიგი შედეგიანი მატჩი ჩაატარა, თუმცა მის ქებულ გარჯას ელვარებას “ბუდუჩნოსტის” საშინაო მარცხი უკარგავს. ბითაძის გუნდმა მონტენეგროს დედაქალაქ პოდგორიცეში მოსკოვის რეგიონის “ხიმკის” უმასპინძლა და დაძაბულ ბრძოლაში – 90:98 დამარცხდა. 

ქართველი ცენტრი თამაშში სათადარიგოთა სკამიდან ჩაერთო და 26:55 წუთში 17 ქულა, 7 მოხსნა (3 შეტევაში), 1 პასი და 2 დაფარება მიითვალა.
გოგამ 6-დან 5 ორქულიანი და 8-დან 7 საჯარიმო ჩააგდო, ბურთი ერთხელ დაკარგა, 4 პერსონალური ფოლი მიიღო, მის წინააღმდეგ კი 5-ჯერ დაჯარიმდნენ.
შედეგად, ბითაძის სარგებლიანობის კოეფიციენტი 25-ს გაუტოლდა და ეს, ამერიკელი ნორის კოულის მაჩვენებელთან ერთად, მასპინძელთა რიგებში საუკეთესო შედეგი იყო. ამ უკანასკნელმა 20 ქულას 11 პასი წაამატა.

“ბუდუჩნოსტს” 6 მოგების წილ 16 მარცხი გააჩნია და კვლავაც ბოლოსწინა. მე-15 ადგილზე რჩება, მომდევნო შეხვედრას კი 22 თებერვალს, ლიტვაში, კაუნასის “ჟალგირისთან” ჩაატარებს.

https://m.youtube.com/watch?v=__lFvnQ73B0

gbf.ge