ვორსკლასთან მატჩის წინ ანდრეი დემჩენკომ პრესკონფერენცია გამართა

3 აგვისტოს 21:00 საათზე კონფერენს ლიგის მე- 2 საკვალიფიკაციო ეტაპის განმეორებით შეხვედრაში გორის “დილა” უკრაინულ “ვორსკლას” დაუპირისპირდება. მატჩის წინ გორელთა კლუბის მთავარი მწვრთნელი ანდრეი დემჩენკო მედიის წარმომადგენლებს შეხვდა და მათ კითხვებს უპასუხა.

-“ვორსკლასთან” პირველი მატჩის შემდეგ ბევრი რამ გავაანალიზეთ, ჩვენ დაწვრილებით გავიარეთ გასული მატჩების ყველა შეცდომა და შევეცდებით საპასუხო მატჩში ეს ყველაფერი გავითვალისწინოთ. პირველმა თამაშმა მეტოქისგან ბევრი ისეთი ნიუანსი გვანახა რასაც არ მოველოდით, თუმცა ახლა შემიძლია ვთქვა რომ მეტოქე კარგად გვყავს შესწავლილი, თუ გვინდა რომ მოედანზე ვდომინირებდეთ აუცილებელია ბურთის კონტროლი მოვახერხოთ. ჩვენი გულშემატკივარი ყოველთვის დიდ ძალას გვაძლევს და საკუთარ მოედანზე მათთან ერთად ამ ორ რაუნდიანი ბრძოლის მოგების ძალა შეგვწევს”. – განაცხადა ანდრეიმ