საქართველოს ნაკრებმა მონტენეგრო დაამარცხა და თბილისის თასის გამარჯვებული გახდა

„თბილისი არენაზე“ გულშემატკივარმა მაღალი კლასის შემსრულებლების სანახაობრივი მატჩი იხილა. საქართველო პირველ ტაიმში უფრო ლაღად თამაშობდა და მოიგო კიდეც საწყისი 20 წუთი (45:39). ამის ერთ-ერთი მთავარი მიზეზი პერიმეტრიდან ტყორცნები იყო – 9 რეალიზებული სამიანი.

მესამე პერიოდში მონტენეგროს დაცვა გაცილებით აგრესიული გახდა და მეტოქემ არათუ გათანაბრება მოახერხა, 7 ქულითაც დაწინაურდა. თუმცა, ბითაძის ჩატენვითა და მაკფადენის სირენასთან ერთად ჩაგდებული სამქულიანით ქართველებმა სხვაობა ორ ქულამდე შეამცირეს.

როგორც ამ გუნდების წინა შეხვედრებში, გამარჯვებულის ბედი ამჯერადაც ბოლო წამებზე უნდა გადაწყვეტილიყო. ასეც მოხდა, მატჩის ბედი კი ისევ და ისევ სამქულიანებმა გადაწყვიტა: მეოთხე პერიოდის კრიტიკულ მომენტებში პერიმეტრიდან თავი ბითაძემ, მაკფადენმა და მამუკელაშვილმა გამოიჩინეს. მამუმ სულაც სირენამდე 1:33 წუთით ადრე ჩააგდო ურთულესი სამიანი და სხვაობა 7-მდე გაზარდა – 79:72. ეს უკვე გამარჯვებას ნიშნავდა. ბოლო წამებზე მეტოქე განზრახ ფოლების ტაქტიკაზე გადავიდა და დუდა სანაძემ სამი ზუსტი ტყორცნა შეასრულა.

ასე და ამგვარად, საქართველოს ნაკრები გამარჯვებულია და პოზიტიური განწყობით მიემგზავრება მსოფლიო ჩემპიონატზე.

1tv.ge