ფოთის “კოლხეთს” რევაზ ძოძუაშვილი გაწვრთვნის
ფოთის “კოლხეთის” მთავარ მწვრთნელად გამოცდილი ქართველი სპეციალისტი, რევაზ ძოძუაშვილი დაინიშნა. მისი ასისტენტი კი კახაბერ პაპავაძე იქნება.
აღნიშნული ინფორმაცია ძოძუაშვილმა პირველ არხს დაუდასტურა.
„ეს ამბავი მართალია – გუნდში ჩემი დანიშვნა ახლახან გადაწყდა. „კოლხეთს“ ახალი სპონსორი ჰყავს, რომელიც შემხვდა და გუნდის ჩაბარება შემომთავაზა. ფოთი ის ქალაქია, რომელმაც ქართულ ფეხბურთს ბორის პაიჭაძე გაუზარდა და უფლება არ მქონდა განზე გადავმდგარიყავი. ახლა გუნდი მძიმე მდგომარეობაშია, მაგრამ ყველაფერს გავაკეთებთ, ეროვნულ ლიგაში ადგილი რომ შეინარჩუნოს“, – ამბობს რევაზ ძოძუაშვილი.
ფოთელები ეროვნული ლიგის გათამაშებაში, 8 ქულით, ბოლო ადგილზე იმყოფებიან. ძოძუაშვილს კი სერიოზული ძალისხმევა დასჭირდება რათა “კოლხეთმა” ლიგაში ადგილი შეინარჩუნოს.